Warta Sunda

Bandit Van Karawang

Giwangkara — Salasa, 9 Desember 1947 jam 04.00 di Markas NICA Walanda, Cililitan Jakarta,  Intelijen Walanda ngalaporkeun yen  Kapten Lukas Sutaryo, nu ku Walanda dilandi Bandit van Karawang, aya di Rawagede, Rawamerta, Karawang. Tuluy Pasukan Walanda ngajorag Karawang rek nyangkalak Kapten Lukas saparakanca. Sawatara tank ngajugjug Desa Rawagede.

Rencana serangan Walanda kaembus ku para pajoang. Para pajoang jeung rahayat ngarusak jalan nu ngahubungkeun patalimarga ka Rawagede,  beulah kulon ngarusak jalan Cilempuk, beulah kidul ngarusak jalan Palawad, beulah kaler jeung wetan ngarusak sasak Garunggung.

Balukar rusakna jalan patalimarga sawatara tank  teu bisa asup. Pasukan kavaleri nembakkeun mariem jeung kanon ka lebah Desa Rawagede nu wargana kurang-leuwih 4.000 urang. Pasukan infantri Walanda maju, asup ka desa muru imah-imah warga.

Salah saurang soldadu Walanda  bari ngokang bedil neangan Kapten Lukas ka unggal imah, tuluy lapor ka pingpinanna, “Teu aya, Mayor, teu kapendak ‘Bandit van Karawang’ teh.”

“Kurang ajar!”Kumpulkeun kabeh warga nu aya di ieu desa!” ceuk Mayor Alphons Wijinen  ambek.

“Kumpul! Hayo kumpul kabeh di dieu!” Soldadu Walanda bebentak, ngumpulkeun warga.

Warga Rawagede  kumpul di pakarangan. Diantarana aya awewe ngora keneh  nu ngelek orokna nu keur ceurik, gigireun awewe nu rada kolot. Soldadu Walanda  molotot ka awewe nu ngelek orok, ”Hey, bejaan aing. Di mana si Lukas, Goblog?”

“Duka, abdi mah teu terang, Tuan.” ceuk eta awewe bari tuluy ceurik.

“Kalah ka leweh siah!” ceuk soldadu Walanda bari  ngokang bedil.

“Paehan weh kabeh lamun teu ngabejaan di mana si Bandit Lukas mah!” ceuk Mayor Alphons Wijinen.

“Nu bener sia ngajawab teh. Di mana si Bandit Lukas?” Soldadu Walanda sakali deui nanya eta awewe ngora.

“Ampun Tuan, teu terang. Leres abdi teu terang.” ceuk eta awewe.

“Kurang ajar!” ceuk soldadu Walanda, tuluy nembak eta awawe nu ngelek orok nepi ka palastra jeung orokna.

“Gustiiiiiiii, aduuuuuuh, anak aing!” Awewe nu rada kolot  muru eta awewe nu ditembak jeung orokna ku soldadu.

Soldadu Walanda  nembak sirah eta awewe nu rada kolot nepi ka sarua palastra. Budak umur lima taunan   ngarontok  awewe nu rada kolot jeung nu tadi ngais orok bari ngajerit, “Emaaaaa,… Teteeeeeeh,…… Ulah ngantunkeun Ujaaaaang,..,” nging ceurik kanyenyerian.

Soldadu Walanda  taya rasrasan nembak eta budak nu umur lima taunan. Eta budak oge palastra, dibarung jumeritna para warga.

Saprak kajadian 9 Desember 1947 ‘Bandit van Karawang’ taya bejana. Pikeun pangeling-ngeling kajadian rajapati, di Desa Rawagede (nu kiwari jadi Desa Balongsari) diwangun Monumen Rawagede, tempat makam masarakat nu jadi korban soldadu Walanda.

Taun 2006 Organisani Masarakat “Komite Nasional Pembela Martabat Bangsa Indonesia (KNPMBI), kulawarga para korban Rawagede katut para saksi, nungtut kaadilan ka pamarentah Walanda.

Tanggal 14 September 2011 pangadilan Den Haag mutuskeun yen pamarentah Walanda dinyatakeun salah. Tanggal 9 Desember 2011 dina raraga mieling 64 taun kajadian Rawagede duta besar Walanda Tjeerd de Zwaan menta dihampura ka para korban Rawagede. Saterusna  kulawarga korban meunang ganti rugi mangrupa duit ti pamarentah Walanda.

Tags

Related Articles

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Back to top button
Close
Close