Warta Sunda

DPRD Jabar: BLT keur UMKM Kurang Efektif

Bandung, Giwangkara — Kurang leuwih 1.028.000 pelaku usaha mikro kecil & menengah (UMKM) di Provinsi Jawa Barat moal lila deui bakal meunang Bantuan Langsung Tunai (BLT) Rp 2,4 juta ti pamarentah pusat sanggeus ayana surat keputusan (SK) nu ditarima ku Dinas Koperasi & Usaha Kecil (KUK).

Diharepkeun, kuayana bantuan eta teh para pelaku UMKM bisa produktif deui disatengahing dampak pandemi covid-19. Antukna roda ekonomi masarakat di Jawa Barat bisa gerak deui, nilik kana morosotna perekonimian masarakat salila ieu.

Nitenan hal eta, Sekretaris Komisi III Dewan Perwakilan Rakyat Daerah (DPRD) Provinsi Jawa Barat Yunandar Rukhiadi Eka Perwira netelakeun, kawijakan eta teh pikeun ngarojong pelaku UMKM sangkan bisa ngamimitian deui usahana.

Hanjakalna, pembagian BLT eta teh bakal kurang efektif saupamana teu dibarengan ku rojongan ti pamarentah dina upaya nyiptakeun pangsa pasarna nu bisa ningkatkeun daya beuli masarakat.

Kituna teh, ceuk Yunandar, lantaran hariwang BLT eta bakal ngaposisikeun pelaku UMKM jadi konsumen. Sabab produk nu dijieunna jadi dikonsumsi ku sorangan atawa disimpen lantaran teu payu dijual. Antukna tujuan tina ayana BLT eta teh jadi teu saluyu sakumaha nu diharepkeun.

“Kuayana bantuan eta, sabenerna kawilang hade. Cindekna, aya wujud perhatian ti pamarentah pusat, pikeun ngarojong deui para pelaku usaha sangkan bisa produktif deui. Tapi ieu hal teh bakal kurang efektif saupamana taya rojongan nu daria ti pamarentah daerah. Kituna teh, lantaran masalahna kiwari teh lain ngan saukur mere modal, tapi pangsa pasarna jeung daya beuli masarakatna. Contona, dina waktu pelaku UMKM meunang duit Rp. 2,4 juta, manehna bisa produksi saperti tukang gorengan misalkeun, saupamana teu payu kumaha? Tangtu produksi jadi numpuk teu kajual,” ceuk Yunandar can lila ieu. 

Yunandar ngajentrekeun, ku ayana lonjakan transaksi digital salila pandemi ieu ngabuktikeun, yen masih keneh aya sabagian masarakat nu daya beulina masih keneh maksimal. Komo deui di Jawa Barat, Gubernur Ridwan Kamil kungsi nyebutkeun aya 65% masarakat nu menta bansos. Hal eta netelakeun yen masih keneh aya 35% masarakat nu kondisi ekonomina masih kawilang mampuh turta bisa diarahkeun pikeun ngabantu ngagerakkeun perekonomian daerah.

“Sakumna pelaku UMKM didaftarkeun ku pamarentah sangkan bisa dibantu dipasarkeun. Nu saterusna diayakeun kampanye promosi. Sanggeus kitu, Insyaa Alllah para pelaku usaha ieu bisa kabantu. Mun henteu kitu, engkena bakal hese sanajan masarakat kiwari geus go digital. Lamun teu bisa masarkeun, nya sarua jeung bohong. Tah, ieu nu can aya jeung kudu dipigawe babarengan teh,” pokna tandes. **

Tags

Related Articles

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Back to top button
Close
Close