Warta Sunda

DPRD Jabar Manghanjakalkeun, Pekerja Pendamping Sosial Teu Meunang Bantuan Bansos ti Kemensos

Bandung, Giwangkara –Kacida ironis-na, yen di Kementerian Sosial (Kemensos) nu fokus utamana mere bantuan sosial (Bansos) tapi teu mampuh mere bansos ka para pekerja pendamping sosial nu boga gajih dihandap 5 juta.

Para pagawe sosial ieu teh ngarupakeun garda panghareupna nu mibanda tugas pikeun ngaping tur ngawal bansos kemensos saperti Bansos Program Keluarga Harapan (PKH)  ti taun 2007 katukang, Bansos Bantuan Pangan Non Tunai (BPNT) taun 2018. Dituluykeun ku ayana kondisi pandemi covid-19 di taun 2020 ieu diluncurkeun deui Bantuan Sosial Tunai (BST) sarta Bantuan Sosial Beras (BSB).

Proses pangapingan pagawe sosial ieu teh teu ngan saukur mastikeun distribusina wungkul, tapi oge kudu nga-verifikasi jeung ngakurkeun data masarakat nu narima bansos dumasar kana Data Terpadu kesejahteraan Sosial (DTKS).

Ketua Komisi II DPRD Jabar Rahmat Hidayat Djati manghanjakalkeun yen para pagawe sosial ieu teu dijamin kasalametan gawena ngaliwatan BPJS Ketenagakerjaan. Sedengkeun aktifitas para pagawe sosial ieu teh kalintang deukeut kana picilakaeun dina waktu keur ngaping para Keluarga Penerima Manfaat (KPM).

“Komo deui dina mangsa pandemi covid-19 saperti kiwari, aya bansos nu diturunkeun ku Kemensos nyaeta BST jeung BSB. Leuwih jauhna deui Jaring Pengaman Sosial (JPS) Bantuan Gubernur (BanGub) sarta bantuan pamarentah kabupaten/kota,” ceuk Rahmat.

Masih ceuk Rahmat, sakumna pangaping (pendamping) jeung pengawas bansos eta teh ngalibatkeun para pagawe sosial. Kawilang ironis, para pagawe nu jadi pangaping sosial nu ngurus bansos, tapi dina waktu aya bansos ketenagakerjaan nu diluncurkeun Kementerian Tenaga Kerja, maranehna (para pendamping) ngan saukur bisa ningalikeun wungkul atawa ngegel curuk.

Kanyataan saperti kieu teh tangtu taya kaadilan keur sakumna warga nagara, utamana keur para pagawe sosial. Saupamana pamarentah puseur (pusat) ngaliwatan Kemensos teu mampuh ngajamin anggaran pikeun kasalametan para pangaping sosial ieu, kuduna bisa ngayakeun upaya ngaliwatan Permensos patali jeung komitmen daerah nu narima program bansos eta.

“Ku ayana Permensos eta, engkena pamarentah daerah  dina hal ieu Pemrov bisa nyiapkeun anggaran dina anggaran taunan ngaliwatan Dinas Sosial Provinsi,” pokna. *

Tags

Related Articles

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Back to top button
Close
Close