Warta Sunda

DPRD Jabar Prihatin Ningali Kondisi Bendungan Irigasi Waru di Kabupaten Karawang

Bandung, Giwangkara — Pingpinan jeung Anggota Komisi IV DPRD Provinsi Jawa Barat nitenan langsung daerah irigasi Bendungan Waru, di Kabupaten Karawang, sawatara waktu katukang. Panitenan eta teh dina raraga monitoring kagiatan taun anggaran 2020.  Anggota Komisi IV DPRD  Provinsi Jawa Barat, Achdar Sudrajat nyebutkeun, yen bendungan Waru ieu teh kawilang strategis tur mampuh mere cai kurang leuwih pikeun 5.000 hektare area pasawahan.

“Dina waktu kiwari, bendungan ieu teh ngan ukur mampuh mere cai ka area pasawahan kurang leuwih 2.000 hektare wungkul, sesana 3.000 hektare tacan kabagean cai. Masalah ieu teh tangtu jadi kawajiban pamarentah,” ceuk Achdar, sanggeus nitenan langsung kondisi bendungan eta.

Nurutkeun Achdar, pihakna prihatin ningali kondisi bendungan jeung irigasi Waru nu kiwari katangen geus raretak tembok beton bendunganna. Padahal mah umur bendungan teh can nepi ka sapuluh taun.

“Pihakna ti Komisi IV meredih ka pamarentah pikeun sagancangna ngalakukeun renovasi, utamana nyeta pikeun ngomean tembok beton bendunganna nu geus retak. Ulah nepi ka engkena kajadian bencana longsor,” ceuk Achdar.

Salian ti di renovasi, diharepkeun kudu aya paningkatan daya tampung cai kucara ngalegaan areal penampungan, sangkan engkena bisa ngahontal areal pasawahan masarakat nu leuwih lega deui.

“Kalancaran pasokan cai keur lahan pertanian, tangtuna bakal aya dampak oge kana paningkatan ekonomi para patani di kabupaten karawang. Masarakat tangtuna bakal bisa melak tilu kali dina waktu sataun, boh keur pare atawa palawija,” pokna.

Tags

Related Articles

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Back to top button
Close
Close