Warta Sunda

Pamekaran Kabupaten Sukabumi Utara, Komisi I DPRD Jabar Ngabantu Masarakat pikeun Menta Kaadilan

Bandung, Giwangkara — Rencana Pembentukan Calon Daerah Otonomi Baru Kabupaten Sukabumi Utara (CDOB KSU) nepika kiwari can aya kaputusan, boh ti mimiti munculna isu ngeunaan masarakat nu miharep ayana pamekaran sababaraha taun katukang, nepi ka ayeuna prosesna masih keneh buntu.

Kituna teh, lantaran prosesna kahambat ku ayana moratorium pamarentahan pusat nu nepi ka kiwari can dicabut keneh wae.

Pikeun ngabahas hal eta, Komisi I DPRD Provinsi Jawa Barat geus ngayakeun kunjungan gawe ka pamarentah daerah kabupaten Sukabumi nu ditarima langsung ku Sekretariat Daerah (Sekda) Kabupaten Sukabumi, Zainul, di Gedung Negara Pendopo Sukabumi, Jalan Raya Ahmad Yani, Kecamatan Warudoyong, Kota Sukabumi, sawatara waktu katukang.

Sekretaris Komisi I DPRD Provinsi Jawa Barat Sadar Muslihat netelakeun, pihakna ngahaja ngayakeun kunjunga gawe ka pamarentah daerah kabupaten Sukabumi lantaran Komisi I DPRD Provinsi Jawa Barat geus meunang mandat ti pingpinanna pikeun nuluykeun nota panganteur ti Gubernur Jawa Barat pikeun nyieun kasapukan (kesepakatan) jeung tilu Calon Daerah Sementara Otonomi Baru (CDOB).

Kituna teh, lantaran di Provinsi Jawa Barat aya tilu nu bakal dimekarkeun daerahna, nyeta Kabupaten Garut Selatan, Bogor Barat jeung Kabupaten Sukabumi Utara.

“Samemeh naskah eta ditandatangan (teken) ku pingpinan, pihakna dibere kawajiban pikeun mariksa deui kasiapan calon-calon daerah otonomi anyar eta. Salah sahijina nyeta CDOB KSU,” pokna teh.

Lian ti eta, daerah kota atawa kabupaten nu aya diwilayah Provinsi Jawa Barat ieu, memang kawilang loba nu hayang dimekarkeun daerahna. Tapi, dumasar kana panalungtikan tim, antukna ngan ukur tilu daerah eta nu bakal dimekarkeun jadi skala prioritas pikeun dibentuk otonomi anyar.

“Tina sakabeh daerah nu ngusulkeun pikeun dibentukna daerah otonomi anyar, alhamdulillah hasil tina panitenan jeung kunjungan gawe teh, nyatana pamarentah daerah kabupaten sukabumi leuwih siap keur pamekaran. Kituna teh lantaran dibentukna CDOB KSU ieu, lain ngan saukur  kahayang wungkul tapi geus jadi kabutuhan pikeun ningkatkeun pelayanan jeung karaharjaan masarakat,” pokna tandes.

Pihakna nyebutkeun yen DPRD Provinsi Jawa Barat, jangji bakal ngupayakeun satekah polah sangkan rarancang CDOB KSU ieu bisa sagancangna ngawujud, sanajan pamarentah pusat masih keneh can nyabut masalah moratorium atawa nerbitkeun peraturan keur pamekaran daerah eta.

“Tapi urang sarerea oge geus pada apal yen presiden netelakeun rehna Papua bakal ngalakukeun pamekaran. Lian ti eta, Menkopolhukam oge kacida ngarojongna. Tangtu eta hal teh lumaku oge pikeun daerah di Jawa Barat,” ceuk Sadar.

Ku kituna, dirina miharep sangkan di Jawa Barat aya panambahan daerah sangkan aya kasaimbangan piskal jeung provinsi sejen nu jumlah pendudukna leuwih saeutik, tapi bisa narima aliran dana ti pamarentah pusat leuwih loba. Kituna teh, lantaran jumlah kabupaten jeung kota, sarta desana leuwih loba.

Ku kituna, pihakna bakal ngarekomendasikeun ka pingpinan DPRD Provinsi Jawa Barat jeung Gubernur nepi ka pamarentah pusat sangkan rarancang pamekaran ieu teh bisa sagancangna ngawujud.

Jeroning kitu, Sekda Kabupaten Sukabumi, Zainul netelakeun, pamarentah daerah Kabupaten Sukabumi, katangen daria ngupayakeun ngeunaan rarancang CDOB KSU eta.

Malah mah, kiwari pamarentah daerah kabupaten sukabumi bakal nyiapkeun kantor pamarentahan pikeun CDOB KSU keur sawatara waktu,  nyeta keur kantor Bupati jeung Setda nu dipuseurkeun di kantor Komplek BKPSDM di Jalan Raya Kadupugur, Cijalingan, Kecamatan Cicantayan.

“Kabehanana geus disiapkeun tur geus diitung, kaasup kajian jeung paguron luhur oge geus dilakonan. Jadi saupamana engke kudu aya nu disampurnakeun pasaratanna tangtu bakal dipigawe sagemblengna,” ceuk Zainul.

Lian ti geus nyiapkeun kantor keur Bupati jeung Setda, pamarentah daerah kabupaten Sukabumi oge nyiapkeun kantor pusat pamarentahan kabupaten Sukabumi Utara mangrupa aset nu pamarentah daerah kurang leuwih 10 hektare legana.

Sedengkeun pikeun pengadaan tanah keur akses asup ka lokasi pusat pamarentahan CDOB KSU dina tahap kahiji, legana kurang leuwih 10.500 meter persegi, waragadna kurang leuwih Rp. 15 miliar di taun 2021, tahap kadua 41.000 meter persegi Rp. 35 miliar taun 2021 sarta tahap katilu 280.000 meter persegi wargadna kurang leuwih Rp. 240 miliar di taun 2022 nepi ka taun 2026.

Pihakna miharep, ku ayana kunjungan gawe ti DPRD Provinsi Jawa Barat ieu teh, bisa jadi energi anyar keur maheutkeun masarakat Kabupaten Sukabumi pikeun ngawujudna CDOB KSU.

Leuwih jauh Zainul netelakeun, revisi ngeunaan wates pamarentahan daerah Kabupaten Sukabumi jeung CDOB KSU hasil ti Badan Koordinasi Survei & Pemetaan Nasional (BAKOSURTANAL) di taun 2010 jadi PTRT Badan Informasi Geofasial, detail watesna 21 kecamatan jeung 161 desa sarta dua kelurahan ngaliwatan penerbitan peraturan bupati (perbup)

Rarancang dibentukna CDOB KSU eta teh, aya 21 Kecamatan jeung 161 desa sarta dua kelurahan. Legana kurang leuwih 947,52 kilometer persegi. Dumasar kana data jumlah jiwa di semeseter taun 2019, jumlah total penduduk Kabupaten Sukabumi nyaeta 2.571.890 jiwa.

“Sedengkeun keur jumlah penduduk CDOB KSU aya 1.322.442 jiwa sarta pikeun jumlah penduduk Kabupaten Sukabumi Induk aya 1.249.448 jiwa nu sumebar di 26 kecamatan dina lega wilayah kurang leuwih 3.214. 89 kilometer persegi,” pokna.*

Tags

Related Articles

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Back to top button
Close
Close